Namatay ang isang 58 anyos na lalaki matapos siyang masunog kasama ang kanyang motor sa Bustos-Plaridel Bypass Road. Naganap ang aksidente pasado alas- 7 ng umaga ng June 2.

Ayon sa kuwento ng kanyang kasama na nakaligtas sa aksidente, nabangga umano sila ng isang L200 van na nagresulta sa pagsemplang ng kanilang motor.

Agad daw na nawalan ng malay ang biktima matapos silang bumagsak. Mabilis din daw na nagliyab ang motorsiklong sinasakyan ng lalaki at nasunog din siya.

Ayon naman sa mga residenteng nasa paligid ng bypass road, sinubukan pa nilang saklolohan ang biktima ngunit agad din itong binawian ng buhay.

Isang pipi ang kasama ng biktima at dahil sa tulong ng mga rumespondeng Rescue 505 ng Bustos na nakakaunawa ng sign language, nakuhanan siya ng salaysay ng pulisya.

Iniimbestigahan na rin ng pulisya ang insidente. Nasa kustodiya na rin nila ang driver ng van na nakasanggi sa biktima.

Samantala, nalunod naman ang isang construction worker sa patubig sa Talampas Bustos, Bulacan. Taga-Batangas daw ang 19 anyos na lalaki na nagtatrabaho sa Bustos bilang isang construction worker sa ginagawang kalsada malapit sa patubig.

Nakipag-inuman umano ang lalaki sa kanyang mga kasamahan sa construction noong May 31 ng gabi. Ayon sa salaysay ng mga saksi, bigla na lang umanong nawala ang biktima at nalaman na lang daw nila na tumalon na pala ito sa patubig.

Ilang minuto na raw ang nakalipas pero hindi pa rin daw umaahon ang lalaki.

Dahil sa malalim ang tubig at madilim sa lugar, hindi makalusong ang Rescue 505 ng Bustos.

Kaya nagdesisyon daw silang sarhan muna ang gate ng patubig para bumaba ang lebel ng tubig. Alas-4 y medya na raw ng madaling araw ng makuha ng Rescue 505 ang katawan ng wala nang buhay na lalaki.

Para sa mga emergency case sa Bustos, Bulacan, maaari kayong tumawag sa Rescue 505 sa mga sumusunod na numero:

0918 918 05 05

0917 143 05 05

044 792 52 62

Photo courtesy of Rescue 505, Bustos, Bulacan