Pinatunayan ng Dabarkads na sila pa rin ang hari ng noontime show nang pumalo sa mahigit 330,000 facebook views online ang muling pagbabalik ng TVJ at Dabarkads sa kanilang muling pag-ere sa TV5.

Hindi naitago ng mga host, lalong-lalo nina Tito, Vic at Joey, ang labis na pagkatuwa nang sabay-sabay silang maluha sa mainit na pagtanggap ng mga manonood kahit pa isang buwan na silang pansamantalang nawala sa pananghalian ng pamilyang Pilipino.

Matatandaan na Mayo 31 nang biglaang naglabas ng anunsyo ang TVJ na hindi na sila pinayagan ng bagong management ng Eat Bulaga na umere ng live na agarang nasundan ng pagreretiro ng mga host.

Ngunit ilang linggo ang nakalipas, heto at binuksan ng TV5 ang kanilang network para sa noontime show ng Dabarkads na tatawaging “EAT: Eto Ang Totoo”.

Hindi pa rin makapaniwala si Joey de Leon sa kanilang pagbabalik at agad na naluha nang sambitin na marami pa silang pwedeng ihandog sa mamamayang Pilipino nang magkakasama ngunit ang pinakamabigat umano na tumatak sa kanila ay ang malaman na mahal sila ng taong bayan.

Bago matapos ay labis ang pasasalamat ng lahat sa TV5, Media Quest, advertisers at sponsors sa tiwala sa EAT at ipinangakong umpisa pa lamang ito ng kanilang pagbabalik. Mapapansin na kasama pa rin ng EAT ang mga endorsers at sponsors nito sa Eat Bulaga.

Regular nang mapapanood ang EAT sa TV5 mula 11:30AM hanggang 2:30PM.

Photo: Screengrab frm EAT