Naiproklama na bilang bagong kinatawan ng ika-pitong distrito ng Cavite si Crispin Diego “Ping” Remulla noong Pebrero 26. Anak siya ni Justice Secretary Jesus Crispin “Boying” Remulla at 7th district provincial board member ng Cavite bago nanalo bilang kongresista.

Isinagawa ang isang special election noong February 25 para punan ang nabakanteng puwesto sa Kongreso ng ngayo’y Department of Justice Secretary Boying Remulla. Itinalaga siya ni Pangulong Ferdinand R. Marcos Jr. bilang kalihim ng departamento matapos ang eleksyon noong May 2022.

Opisyal na naideklara si Remulla sa Sangguniang Panlungsod plenary hall sa loob ng Cavite Provincial Capitol noong Pebrero 26. Nakakuha siya ng kabuuang boto na 98,474 laban sa kanyang mga katunggaling sina dating Trece Martires Mayor Melencio De Sagun (46,530), Lito Aguinaldo (1,610) at Mike Santos (1,068).

Noong araw ng halalan, kasama ni Remulla ang kanyang asawang si Georgia at ang kanyang amang si Secretary Boying Remulla sa pagboto sa Tambo Malake Elementary School sa bayan ng Indang.

Sa isang panayam, sinabi ni Remulla na marami silang nagawa noong kampanya dahil nakilala niya ang marami sa kanyang mga kababayan sa distrito.

Tumanggi naman siyang magbigay ng pahayag tungkol sa disqualification case na isinampa laban sa kanya ni De Sagun noong Pebrero 23. Ayon sa reklamo, sumali diumano si Remulla sa isang social services event ng Trece Martires noong campaign period. Ayon kay De Sagun, malinaw daw na paglabag ito sa election code. Naipost daw ang naturang event sa social media account ng lokal na pamahalaan ng Trece Martires.

Nangako naman ang COMELEC na magsasagawa ng imbestigasyon tungkol sa alegasyon laban kay Remulla.

“It is very premature to conclude at this early stage, but we promise to take a deeper investigation for the filed disqualification case,” ayon kay COMELEC Chairperson George Garcia.

Source: Philippine News Agency, Ping Remulla Fb Page