Nasakote ng pulisya ng Bulacan ang tinawag nilang high value drug suspect at nakuha diumano sa kanya ang tinatayang dalawang kilo ng high grade shabu noong January 25 sa Marilao, Bulacan.

Ayon sa pahayag ng Bulacan Police Provincial Office, kinilala ang suspek na si Marlon Palmario, 44 years old at residente ng Novaliches, Caloocan City. Naaresto siya sa Barangay Loma de Gato sa isang diumano’y entrapment operation o sa akto ng pagbebenta ng iligal na droga sa mga undercover police.

“Confiscated from the suspect were two packs of high grade shabu concealed in a Chinese tea bag with a total estimated weight of 2,050 grams and estimated street value of Php13,940,000.00, and 67 pieces of one-thousand-peso bill boodle money,” ayon sa pulisya.

Nahaharap ang suspek sa kasong paglabag sa Section 5 (sale of dangerous drugs) at Section 11 (possession of dangerous drugs) ng Comprehensive Dangerous Drugs Act of 2002 (R.A. 9165). Kung mapatunayan ng hukuman na siya ay nagkasala, maaari siyang makulong ng habambuhay at magmulta ng P500,000 hangang sampung milyong piso.

Photo:Police Regional Office 3