Binaril at napatay nitong nakaraang araw ng Lunes ng mga hindi nakikilalang riding-in-tandem ang municipal consultant on internal affairs ng bayan na ito.

Base sa police report, nakilala ang biktima na si John Emerson, at residente ng Barangay Tambubong sa San Rafael.

Base sa inisyal na imbestigasyon, ang biktima kasama ang dalawang iba pa ay lulan ng isang itim na Toyota Avanza, na may license plate na NDC 4879, sa kahabaan ng Cagayan Valley Road sa Barangay Sampaloc, nang lapitan ito sa driver’s side ng dalawang suspek na lulan ng isang kulay asul na Mio na motorsiklo.

Pagtapat ng mga suspek sa biktima ay pinagbabaril kaagad siya ng hindi malaman na kalibre ng baril at mabilis na tumakas papunta sa bayan ng San Ildefonso.

Mabilis na isinugod si Emerson sa Ace Medical Center sa Lunsod ng Baliuag para magamot sa mga tinamong tama ng mga bala ng baril ngunit kalaunan ay nalagutan na rin siya ng hininga.