Nakakikilabot na kamatayan ang sinapit ng 17-anyos na babaeng estudyante sa Caloocan city matapos na ilang ulit siyang pinalo ng martilyo sa ulo noong madaling araw ng Lunes, Oktubre 23.

Naisugod pa ng kanyang mga kamag-anak sa ospital ang Grade 12 na biktimang nakilalang si Daisy Mae Notario pero idineklarang patay na dahil sa tinamong matinding pinsala sa ulo na bunga ng pamamalo.

Ayon sa Caloocan City Police Station, naganap ang pamamaslang dakong ala-1:30 ng madaling araw habang nag-iisa sa kanilang inuupahang bahay sa Dagat-Dagatan, Barangay 12 ang biktima.

Isang kapitbahay umano ang nakarinig ng kakaibang ingay na nagmumula sa loob ng bahay ng biktima kaya’t nagsiyasat siya at dito niya nasilip sa nakabukas na sliding door ang nakahandusay na katawan ng dalagita habang umaagos ang dugo sa ulo.

Agad umanong tinawag ng naturang kapitbahay ang mga pinsan ng biktima at humingi rin sila ng tulong at responde mula sa barangay.

Pagnanakaw ang isa sa mga tinitingnang motibo sa krimen dahil nawawala umano ang cellphone at pera ng biktima gayundin ang ilang mga gamit ng kaniyang tatay na noong mga oras na iyon ay naghatid ng mga paninda sa asawa sa Bulacan.

Dakong hapon ng Oktubre 24 ay naaresto ang suspek.

Sa text message ni Caloocan Chief of Police PCol. Ruben Lacuesta sa Arkipelago News Caloocan, sinabi niya na naaresto na ang suspek na tinawag nilang si Alyas RJ.

“Arrested suspect personal profile Alias RJ, 40 years old, male, single, painter and victim’ s neighbor .”

Dagdag pa ni Col. Lacuesta, “Ongoing po ang documentation natin at pangangalap pa po ng additional evidence.”

Humiling naman ng panalangin para sa biktima ang grupong Interact Club ng M.B Asistio Sr. High School Main.

Sa Facebook post ng grupo, sinabi nito na, “Labis po naming ikinalulungkot na ibalita ang pagpanaw ng isa sa ating masipag, maasahan, at napakabait na Interactor na si Ate Daisy Mae Notario. Panalangin at pakikiramay po sa mga naiwan ni Daisy.”

Photo: Interact Club of M.B Asistio Sr. High School Main.