Hinuli ng mga awtoridad sa Caloocan City ang dalawampu’t dalawang indibidwal kabilang ang limang menor de edad dahil sa paglabag sa umiiral na curfew hours mula alas-10 ng gabi hanggang alas-4 ng madaling araw.

Ayon sa mga awtoridad, nahuli ang mga curfew violators sa bahagi ng Barangay 69.

Ilan sa mga nahuling curfew violator ay wala raw suot na face mask habang ang iba naman daw ay natiyempuhan pang nag-iinuman.

Kasunod nito ay pagmumultahin ng tatlong libong piso ang mga nahuling lumabag sa umiiral na curfew, habang ang mga menor de edad naman ay kinausap ang kani-kanilang mga magulang.

Tiniyak din ng Caloocan police at barangay officials na nakasasakop sa naturang lugar na magpapatuloy ang kanilang pagpapatrolya at panghuhuli sa mga lumalabag sa umiiral na panuntunan.

Photo courtesy of Mayor Oscar ‘Oca’ Malapitan Fb Page