Inaresto ng mga awtoridad mula sa Muntinlupa City Police Station ang sinasabing notoryus na lider ng Hudas Robbery Group sa isang apartment sa Poblacion sa Muntinlupa City.

Kinilala ng pulisya ang nadakip na suspek bilang si Jose Hilario o mas kilala diumano sa alyas na Hudas.

Sa isinagawang imbestigasyon ng pulisya, bukod daw sa pagiging lider ng isang robbery group, napag-alaman din ng mga awtoridad na may nakabinbing warrant of arrest si Hilario dahil sa kasong murder o pagpatay.

Tinukoy pa ng Muntinlupa Police na ang naturang grupo ni Hilario ang siyang nasa likod diumano ng kidnapping, pagnanakaw ng motor, pagbebenta ng iligal na droga at gun for hire activities sa Muntinlupa at Laguna.

Kasunod nito ay pinapurihan ni NCRPO Chief, Major General Vicente Danao Jr., ang pagkakahuli sa naturang suspek.

“Binabati ko po ang ating mga tauhan sa matagumpay na paglalatag ng manhunt operation upang sa wakas ay matunton at madakip ang akusadong ito na bukod sa wanted sa kasong murder ay isa ding notorious na leader ng Hudas Robbery Group. Sa kabila ng umiiral na pandemya, ipagpatuloy nawa natin ang pagpapaigting ng ating mga kampanya laban sa kriminalidad, iligal na droga, terorismo/ insurgency at korupsyon. Gayun din sa mga taong ito na pinaghahanap ng batas.” ani General Danao.

Photo courtesy ofNCRPO.