Shyrla Santos Nuñez ng Caloocan City nagwagi bilang Miss Supermodel Philippines 2023

Kate Papina March 9, 2023 at 08:44 AM

Nanalo ang pambato ng Lungsod ng Caloocan na si Shyrla Santos Nuñez bilang bagong Miss Supermodel Philippines 2023 sa ginanap na coronation night sa Manila Hotel noong March 6. Itinanghal din ang 25 years old na dalaga bilang Best in Filipiniana at Miss Congeniality. Isa rin siya sa tatlong mapalad na napili bilang “Print Supermodels,” kasama sina Aileen Santiago mula sa Cabanatuan City at Querubin Gonzalez mula sa Marinduque.

Dentista at lisensyadong magsagawa ng Orthodontics at Implant Dentistry ang beauty queen mula sa Caloocan. Hindi na bago sa kaniya ang pagsali sa mga beauty pageant. Sa katunayan, nakasama siya sa top 50 ng Miss Universe Philippines noong 2021 kung saan nirepresent din niya ang Lungsod ng Caloocan.

Inilipat kay Nuñez ang korona mula kay reigning Miss Supermodel Worldwide Alexandra Mae Rosales na unang Pilipinang nakapag-uwi ng pandaigdigang titulo.

Si Nuñez ang magiging kinatawan ng ating bansa sa 4th Miss Supermodel Worldwide na gaganapin sa New Delhi, India sa darating na Abril.

“It took years to have the strength to come out of my comfort zone, to walk over my doubts and worries, and to be the woman I am today. Still, a work in progress — but is proud of herself, is not afraid to make mistakes, and loves herself despite her flaws and imperfections because she knows she strives to be better each day,” ayon sa pahayag ni Nuñez sa kanyang Facebook page.

Nagsimula ang Miss Supermodel Worldwide beauty pageant noong 2018. Pagmamay-ari ito ni Sandep Kumar na isang Indian businessman. Ang motto ng pageant ay “Beauty with Intellect”. Layunin daw ng patimpalak na bigyan ng pagkilala ang kapangyarihan ng mga kababaihan at isulong ang turismo at kultura ng bawat lahi.